Zv. Ministri Demelezi qëndroi për vizitë në fshatin Nerodime
15.08.2023Prishtinë, 15 gusht 2023 – Zëvendësministri i Bujqësisë, Pylltarisë dhe Zhvillimit Rural, Imri Demelezi ka zhvilluar një vizitë në fshatin Nerodime, tek ferma e Rasim Hamiti, një fermer i suksesshëm i cili ka 150 koshere bletësh dhe njëkohësisht është përfitues i grantit me projektin “Ndërtimin e Dhomës së Mjaltit dhe blerja e pajisjeve për Bletari".
Në kuadër të vizitës, Z. Demelezi pati rastin të shoh nga afër të gjitha përpjekjet dhe investimet e bëra nga z. Hamiti dhe familja e tij në zhvillimin e fermës së tyre. Projekti i ndërtimit të Dhomës së Mjaltit dhe blerja e pajisjeve për bletari, i mbështetur nga granti i Ministrisë Bujqësisë, Pylltarisë dhe Zhvillimit Rural, ka treguar se me angazhim dhe vullnet të fortë për të rritur produktivitetin, bujqësia dhe bletaria mund të kontribuojnë ndjeshëm në zhvillimin e rajoneve rurale.
Gjatë bisedave me Rasim Hamiti, z. Demelezi ka shprehur inkurajimin e tij për përpjekjet e fermerit në diversifikimin e aktiviteteve bujqësore dhe në investimet e bëra për të përmirësuar cilësinë dhe konkurrueshmërinë e produktit të tyre të mjaltit. Në këtë kontekst, ai ka theksuar edhe rëndësinë e mbështetjes të vazhdueshme qeveritare për të lehtësuar rrugën e bujqve drejt inovacionit dhe rritjes së performancës në fushën e bletarisë.
z. Hamiti, u shpreh falënderues nga vizita dhe asistenca e ofruar nga ministria përmes grantit, për të cilin beson se do të jetë një shtysë shumë e madhe për të dhe familjen e tij në arritjen e objektivave në sektorin e bletarisë.