Ministri Faton Peci pret në vizitë zyrtare homologun e tij nga Maqedonia e Veriut, Ljupço Nikolovski

Prishtinë, 30 nëntor – Ministri i Bujqësisë, Pylltarisë dhe Zhvillimit Rural sot priti në takim homologun e tij nga Maqedonia e Veriut, Ministrin e Bujqësisë, Pylltarisë dhe Ekonomisë së Ujërave, Ljupço Nikolovski me të cilin diskutuan rreth mundësive të bashkëpunimit, me qëllim të avancimit të mëtutjeshëm të sektorëve të cilat mbulojnë institucionet gjegjëse të cilat drejtohen nga dy ministrat.

“U dakorduam që ta thellojmë bashkëpunimin ndër-institucional e ndër-shtetëror duke hartuar projekte të përbashkëta ndër-kufitare me qëllim të fuqizimit ekonomik të bujqve që jetojnë rreth zonës kufitare Kosovë - Maqedoni e Veriut. Njëherit, ramë dakord për shkëmbim eksperiencash në hartimin e politikave, përafrimin e tyre me ato të BE-së, heqjen e barrierave jo-tarifore, rritjen e kontrollit kufitar me qëllim ruajtjen e sigurisë ushqimore, hartimin e përbashkët të politikave pyjore, si dhe krijimin e një grupi teknik-administrativ i cili do t'i bartë më tutje frerët e hartimit dhe implementimit të marrëveshjeve që do vijojnë mes institucioneve tona” u shpreh Ministri Faton Peci pas takimit.

Ministri i BPZhR-së, Faton Peci pas takimit e falënderoi Ministrin Nikolovski për vizitën, konstruktivitetin dhe bashkëpunimin e ndërsjelltë. Të dy ministrat u zotuan të kultivojnë marrëdhëniet miqësore që popujt e tyre kanë mes vete, si dhe të hapin rrugë drejt forcimit të pozitës së bujqve të të dyja vendeve përmes shkëmbimit të praktikave më të mira që do t’ua lehtësojnë veprimtarinë e tyre bujqësore.